Tunc Afşar: “Şeferlə müqaviləni mən imzalamamışam” – MÜSAHİBƏ

“Bakı” futbol klubunun sabiq vitse-prezidenti Tunc Afşarın Lent.az-a müsahibəsi

- Hazırda “Bakı” ilə hər hansı əlaqəniz var?

- Xeyr. Avropa Liqasının I təsnifat mərhələsində Joel Epalle ilə bağlı məlum olaydan sonra tutduğum vəzifədən istefa vermişəm.

- Necə oldu ki, baş məşqçi postuna məhz Vinfrid Şefer təyin olundu?

- Bu, “Bakı” rəhbərliyinin qərarıdır. Bir neçə variant var idi. Sonda Şeferin təyinatı daha məqsədəuyğun sayıldı.

- Bəs Şeferlə danışıqları kim apardı?

- Danışıqları mən aparmışam. Almanca bildiyim üçün bu səlahiyyət mənə verilmişdi.

- Onunla müqaviləni kim imzalayıb?

- Mən qol çəkməmişəm. “Bakı” klubunda bütün sənədlərə imza atmağa iki nəfərin səlahiyyəti çatır. Bunlardan biri klub prezidenti Hafiz Məmmədov, digəri isə vitse-prezident Yaşar Seyidovdur.

- Müqavilə şərtlərindən xəbəriniz yoxdur?

- Xeyr.

- “Bakı”nın yeni baş məşqçisinin Aleksandr Starkov olacağı gözlənilir. Buna münasibətiniz necədir?

- İnşallah, xeyirlisi olar. Komandada hər bir qan dəyişikliyi faydalı olması üçün baş verir.

- Şeferin vaxtından əvvəl istefaya göndərilməsinə necə yanaşırsınız?

- Mən hər bir baş məşqçiyə minimum bir il vaxt verməyin tərəfdarıyam. Çünki həmin mütəxəssisin işinin nəticəsini əyani şəkildə məhz bu müddət ərzində görmək mümkündür.

Elşən MƏMMƏDOV