“Qızıl top” sahibini tapır

Lent.az-ın məlumatına görə, tədbir Bakı vaxtı ilə saat 22:00-da başlanacaq. Bu ildən etibarən fəxri mükafatı FİFA və “France Football” jurnalı dünyanın ən yaxşı futbolçusuna təqdim edir.

Mükafata 3 iddiaçı var. Onların hamısı - 2009-cu ildə “Qızıl top”u qazanmış argentinalı Lionel Messi, eləcə də ispaniyalı Andres İnyesta və Xavi Ernandes İspaniyanın “Barselona” klubunu təmsil edir. Seçimi bütün dünya üzrə 600-dən çox məşqçi, futbolçu və jurnalist edib. Messi, İnyesta və ya Xavi Luis Suares (1960), Yohan Kroyf (1973, 1974), Xristo Stoiçkov (1994), Rivaldo (1999), Ronaldinyo (2005) və Messinin (2009) ardından “Barsa”ya 8-ci “Qızıl top”u qazandıracaqlar.

Qeyd edək ki, “Qızıl top”a cəmi 3 futbolçu - Yohan Kroyf, Mişel Platini və Marko van Basten hamıdan çox sahib çıxıb. Onlar hərəyə 3 dəfə bu mükafatı əldə edib.