Azərbaycan yığması dünya çempionatında 3 gümüş, 2 bürünc medal qazandı

Azərbaycan Sayokan Döyüş Növləri Mərkəzinin yığma komandası WOF-Dünya Oriental-Döyüş İdman Federasiyasının Türkiyənin Antalya şəhərində təşkil etdiyi dünya çempionatında uğurla çıxış edib. Mərkəzin mətbuat xidmətindən Lent.az-a verilən məlumata görə, millimiz 3 gümüş, 2 bürünc medal qazanıb.

Antalyanın ən böyük idman sarayı olan “Kəpəz Spor Salonu”nda keçirilən yarışda Emin Əliyev (54 kq), Anar Əliyev (64 kq) və Tural Rəhimov (68 kq) gümüş, Vüsal Əliyev (58 kq) və Allahverdi Zamanov (85 kq) bürünc medala layiq görülüblər.

Azərbaycan Sayokan Döyüş Növləri Mərkəzinin prezidenti Vasif Namazov komandamızın çıxışını belə dəyərləndirib: “Komandamız bu döyüş təlimi üzrə ilk dəfə idi ki, tanış olurdu. Lakin idmançılarımızda olan ruh yüksəkliyi öz bəhrəsini verdi, biz vətənə 5 medalla qayıtdıq. Sayokan idmançıları bu cür müxtəlif yarışlarda iştirak edərək həm ölkəmizin, həm də öz döyüş sənətimiz olan Sayokan döyüş təliminin gücünü nümayiş etdirməkdə davam edəcək. Növbəti yarışımız fevralda Rusiyada olacaq”.