Azad Rəhimov idmançılarımızın qazandığı medalları hesabladı

2010-cu il ərzində Azərbaycan idmançıları beynəlxalq yarışlarda 675 medal qazanıb. Lent.az-ın məlumatına görə, bu haqda Gənclər və İdman naziri Azad Rəhimov bildirib. Keçən il idmançılarımızın 619 medal qazandığını qeyd edən nazir bu il 56 medal artıq əldə olunduğunu vurğuladı: “Bu o deməkdir ki, orta hesabla hər gün iki dəfə Azərbaycan bayrağı beynəlxalq arenada qaldırılıb”.

A.Rəhimov həmçinin qeyd etdi ki, əldə olunan medalların 206-sı olimpiya idman növlərində qazanılıb: “Qarşıdan gələn 2011-ci il Azərbaycan idmançıları üçün lisenziya ili kimi də qeyd olunmalıdır. Ümid edirəm ki, idmançılarımız 2012-ci ildə keçiriləcək London Olimpiya oyunlarına 2008-ci ildə Pekində baş tutan turnirdən daha çox lisenziya qazanacaq”.

Qeyd edək ki, Azərbaycan idmançıları Pekin olimpiadasında 7 medal əldə etmişdi.

Elşən MƏMMƏDOV