Azərbaycan millisi 2010-cu ili 98-ci pillədə başa vurdu

Lent.az-ın məlumatına görə, Azərbaycan milli komandası ötən ayla müqayisədə 8 pillə geriləsə də, ili ilk “100-lük”də başa vurmağa müvəffəq olub.

Hazırda 343 xala malik millimiz 98-ci pillədə qərarlaşıb. Lakin bu, Zaqafqaziya respublikaları arasında ən aşağı göstəricidir. 1 pillə geriləyən Ermənistan 515 xalla 60-cı, 5 pillə irəliləyən Gürcüstan isə 449 xalla 73-cüdür.

2012-ci il Avropa çempionatının seçmə qrup mərhələsində yığmamızın rəqiblərindən Almaniya 3-cü pilləyə yüksəlib. Hazırda 1485 xala malik Bundestim 1 pillə irəliləyib. 2 pillə geriləyən Türkiyə 741 xalla 31-ci, 3 pillə irəliləyən Avstriya 569 xalla 46-cı, 5 pillə irəliləyən Belçika 526 xalla 57-ci, 1 pillə geriləyən Qazaxıstan isə 138-cidir.

Siyahıya isə 1887 xalla yenə dünya və Avropa çempionu İspaniya başçılıq edir. Dünya çempionatının gümüş mükafatçısı Hollandiya 1723 xalla 2-ci pillədə qalıb. 5 qat dünya çempionu Braziliya 1 pillə geriləyib. Hazırda pentakampeonlar 1446 xalla 4-cü pillədə qərarlaşıblar. Sonrakı 4 pillədə olan Argentina (1338), İngiltərə (1195), Uruqvay (1152) və Portuqaliyanın (1090) mövqeyi dəyişməyib. Misirlə Xorvatiya isə yerlərini dəyişiblər. 1078 xala malik Misir 9-cu pilləyə yüksəldiyi halda 1075 xalı olan Xorvatiya 10-cu pilləyə enib.

Qeyd edək ki, növbəti reytinq cədvəli 2011-ci il yanvarın 12-də açıqlanacaq.