Azərbaycan şirkəti Gürcüstan Futbol Federasiyası ilə müqavilə imzalayacaq
14 dekabr 2010 16:09 (UTC +04:00)

Azərbaycan şirkəti Gürcüstan Futbol Federasiyası ilə müqavilə imzalayacaq

Bu haqda Lent.az-a şirkətin baş direktoru Mahir Məmmədov məlumat verib. Onun sözlərinə görə, hazırda hər iki qurumun marketinq bölməsinin əməkdaşları müvafiq sənəd üzərində işləyirlər. Artıq tərəflər arasında müəyyən anlaşmalar da əldə edilib. Rəsmi müqavilə isə ilin sonunadək bağlana bilər: “Biz istəyirik ki, 2011-ci ilədək GFF-lə münasibətlərimizi rəsmiləşdirək”.


Müqavilənin 1 il müddətinə imzalanması nəzərdə tutulub. M.Məmmədov bildirib ki, anlaşma şirkətin məhsullarının tanıdılmasına qədər geniş layihəni əhatə edəcək. Bu məqsədlə Gürcüstan milli komandasının məşq formalarının üzərində “SOCAR Energy Georgia”nın reklamları, yığmanın oyunları vaxtı meydançaların kənarlarında isə bannerləri yerləşdiriləcək.


Qeyd edək ki, hazırda Gürcüstan yığması 2012-ci il Avropa çempionatının seçmə mərhələsində F qrupunda mübarizə aparır. Baş məşqçi Temuri Ketsbayanın komandası keçirdiyi 4 oyunda Maltanı 1:0 hesabı ilə yenib, Latviya və Yunanıstanla səfərdə 1:1, İsraillə isə Tiflisdə 0:0 hesablı heç-heçəyə nail olub. FİFA-nın noyabr ayı üçün açıqladığı reytinq cədvəlində 78-ci olan Gürcüstan millisi növbəti seçmə matçını 2011-ci il martın 26-da öz meydançasında Xorvatiya ilə keçirəcək.

Elşən MƏMMƏDOV
# 505

Oxşar yazılar