“Xəzər Lənkəran”ın heyətində qol vuranların sayı 64-ə çatdı

Lent.az-ın klubun rəsmi saytına istinadən verdiyi məlumata görə, Amid Hüseynov və Ramazan Abbasov Lənkəran komandasının heyətində ilk dəfə fərqləniblər.

Onlar “ağ-yaşıl” formada qol sevinci yaşayan 63-cü və 64-cü futbolçu olublar. İkinci mövsümdür “Xəzər Lənkəran”ın sıralarında olan Abbasov yalnız 19-cu qarşılaşmada qol hesabını açıb. Hüseynov isə bunu daha erkən bacarıb. “Xəzər Lənkəran”ın yetirməsi olan gənc futbolçu 5-ci oyununda fərqlənib. Onlar komandada qol vuran oyunçular siyahısına cari mövsümdə daxil olanların sayını 8-ə çatdırıblar. Bunadək Dieqo Ruiz, Elnur Allahverdiyev, Katalin Doman, Konstantin Arbanas, Uinston Parks və Stelian Stanku da “Xəzər Lənkəran”dakı qol hesabını mövsümün əvvəlki 18 qarşılaşmasında açmışdılar.

Qeyd edək ki, “Xəzər Lənkəran”ın rəqib qapısına yol tapan 64 futbolçuyla yanaşı daha 4 rəqib avtoqol müəllifi kimi komandaya sevinc bəxş edib.