Əfsanəvi tennisçinin qazandığı 70 kubokun çoxu oğurlanıb

Lent.az-ın məlumatına görə, bu haqda “Los Angeles Times” qəzetinə Samprasın özü açıqlama verib.

O bildirib ki, kuboklardan məhrum edilməsi ondan tennisçi karyerasını almağa bərabərdir. Sampras kubokların qaytarılması xahişi ilə ictimaiyyətə müraciət edib. 39 yaşlı tennisçi onları öz övladlarına göstərmək istədiyini bildirib: “Mən titullarını sevən və onlarla öyünənlərdən deyiləm. Heç vaxt belə insanlardan olmamışam. Sadəcə, uşaqlarım necə oynadığıma şahidlik etməyiblər. İstərdim ki, övladlarım kuboklarımı görsünlər. Onların tapılma ehtimalının az olduğunu bilirəm. Amma heç olmasa, buna cəhd etməsəm, çox təəssüflənəcəyəm. Bəlkə kimsə kuboklarımın yerini bilir? Buna yalnız ümid edə bilərəm”.

Oğrular Samprasın ATP (Peşəkar Tennisçilər Assosiasiyası) seriyasından turnirlərdə fərdi mübarizədə qazandığı 64-dən çox kuboku, 2 Devis Kubokunu, habelə, 1993 – 1998-ci illərdə dünyanın 1 nömrəli tennisçisi kimi qazandığı 6 kuboku aparıblar.

Qeyd edək ki, Pit Sampras tennis tarixində ən güclülərdən sayılır. O, karyerası ərzində “Böyük dəbilqə” seriyalı turnirlərdə 14 qələbə qazanıb və 286 gün ərzində dünyanın 1 nömrəli tennisçisi kimi mövqeyini qoruyub.