“Barselona”nın hücumçusu xəstəxanaya düşdü

Lent.az-ın “Marca”ya istinadən verdiyi məlumata görə, Krkiç ilk yarıda “Rubin”in müdafiəçisi Salvatore Bokketti ilə toqquşma nəticəsində başından güclü zərbə alıb.

“Barsa”nın oyunçusu meydançanı xərəkdə tərk edib. Onu xəstəxanaya aparıblar. Futbolçunun sağlamlığına təhlükə yoxdur. Amma ehtiyat tədbiri kimi həkimlər futbolçunu səhərədək saxlamağı məqsədəuyğun sayıblar. Krkiçin yaşıl meydançalara nə vaxt qayıdacağı məlum deyil.

Bununla yanaşı, matçın əvvəlində zədə üzündən Kataloniya klubunun digər forvardı Xeffren də əvəzlənməli olub. O, ayaq əzələlərindən xəsarət aldığı üçün meydançanı tərk edib. Xeffrenin uzun müddətə sıradan çıxdığı ehtimal olunur. Amma dəqiq bərpa tarixi tibbi müayinədən sonra açıqlanacaq.

Qeyd edək ki, oyun “Barselona”nın qələbəsi ilə başa çatıb – 2:0. Qolları ikinci hissədə Andreu Fontas və Viktor Vaskes vurub. “Barsa” Çempionlar Liqasının 1/8 finalına, “Rubin” isə Avropa Liqasının 1/16 finalına çıxıb.