Futbolçular hakimin burnunu qırdılar –

Lent.az-ın “Milliyet” qəzetinə istinadən verdiyi məlumata görə, qarşılaşmanın 85-ci dəqiqəsinədək “Konya Çatalhüyük Cumra Belediyespor” 1:0 hesabı ilə öndə olub.

Lakin son dəqiqələrdə “Akdeniz Belediyespor” 2 qol vuraraq, qələbə qazanıb - 2:1. Bu komandanın 2-ci qolunda topun qapı xəttini keçmədiyini iddia edən “Konya Çatalhüyük Cumra Belediyespor”un futbolçuları qol qərarını verən yan xətt hakimi M. Murat Əmrəyə uzun müddət etiraz ediblər. Baş hakim Şaban Elbaştı onlardan birinə qırmızı vərəqə göstərib.

Final fitindən sonra isə qonaq komanda laynsmanın üstünə cumub. Təhlükəsizlik qüvvələrinin müdaxilələrinə, “Akdeniz Belediyespor” rəsmiləri və məşqçilər heyətinin oyunçuları sakitləşdirmək cəhdlərinə baxmayaraq, M. Murat Əmrə “Konya Çatalhüyük Cumra Belediyespor”lu futbolçuların yumruqlarından yayına bilməyib. O, yediyi yumruğun təsirindən yerə yıxılıb. Yan xətt hakimi təcili yardım maşını ilə xəstəxanaya çatdırılıb. Burnu qırılan M.Murat Əmrənin onu vuran oyunçulardan şikayət edəcəyi məlum olub.