Zurab Azmayparaşvili Azərbaycan yığmasından kənarlaşdırıldı
07 dekabr 2010 15:24 (UTC +04:00)

Zurab Azmayparaşvili Azərbaycan yığmasından kənarlaşdırıldı

Bu haqda Lent.az-a yığmamızın baş məşqçisi Fikrət Sideifzadə məlumat verib. Onun sözlərinə görə, buna federasiya rəhbərliyi ilə gürcüstanlı mütəxəssis arasında yaranan anlaşılmazlıq səbəb olub. Lakin Sideifzadə anlaşılmazlığın nədən qaynaqlandığını açıqlamayıb: “Azmayparaşvili federasiyamızın rəhbərliyi ilə düz gəlmədi. Nə isə söz-söhbət oldu. Nəticədə onu kapitanlıqdan çıxartdılar”.


Hazırda kişilərdən ibarət yığmamızın kapitansız olduğunu deyən təcrübəli mütəxəssis məsələnin 2011-ci ilin ortalarınadək həllini tapacağını bildirib.


Qeyd edək ki, Zurab Azmayparaşvili Azərbaycanın kişilərdən ibarət yığmasına 2009-cu ilin oktyabrında kapitan təyin olunub. Onun başçılığı ilə ötən il Avropa çempionu olan komandamız 2010-cu il dünya çempionatında 4-cü, Ümumdünya Şahmat Olimpiadasında isə 12-ci yeri tutub. Olimpiadadan sonra Azmayparaşvili istefa verdiyini açıqlasa da, AŞF onunla bağlı bu yaxınlarda yekun qərar verib.

Elşən MƏMMƏDOV
1 2 3 4 5 İDMAN XƏBƏRLƏRİ
# 586

Oxşar yazılar