Azərbaycan çempionu Çempionlar Liqasında mübarizəyə başlayır

Voleybolçu qadınlardan ibarət “Rabitə” klubu Çempionlar Liqasının qrup mərhələsində mübarizəyə başlayır. Lent.az-ın məlumatına görə, E qrupunda yer alan Azərbaycan çempionu noyabrın 24-də Bakı vaxtı ilə saat 19:00-da Rumıniyanın paytaxtı Buxarestdə “Dinamo Romprest”lə üz-üzə gələcək.

Oyunu makedoniyalı Zdravko Zdraveski ilə yunanıstanlı Georgios Georquleas idarə edəcək. Valeri Delutr isə Avropa Voleybol Konfederasiyasının nümayəndəsi olacaq. Qarşılaşma “İdman Azərbaycan” telekanalı vasitəsilə canlı yayımlanacaq.

Artıq komandaların oyun üçün iştirak ərizəsi də açıqlanıb. Meydan sahiblərinin tərkibində 8 rumıniyalı, eləcə də bolqarıstanlı, slovakiyalı, yaponiyalı və serbiyalı voleybolçular yer alıblar. Komandamızın heyətində cəmi 1 milliləşdirilmiş azərbaycanlı – Natalya Məmmədova çıxış edəcək. Qalan voleybolçulardan 5-i serbiyalı, 2-si ukraynalı, eləcə də latviyalı, xorvatiyalı, amerikalı və bolqarıstanlıdır.

Qeyd edək ki, qrupun digər matçında “Skavolini” (Pesaro, İtaliya) “Aluprof” (Bielsko-Biala, Polşa) ilə üz-üzə gələcək. Görüş Bakı vaxtı ilə saat 23:30-da başlanacaq.