Bir ölkə yığması London olimpiadasından kənarlaşdırıldı

Lent.az-ın Beynəlxalq Gimnastika Federasiyasının (FİG) rəsmi saytına istinadən verdiyi məlumata görə, buna qadın gimnast Hon Su Çjon haqda yalan bilgilərin verilməsi səbəb olub.

2003 – 2010-cu illərdə Çjonun təvəllüdü gah 1985, gah 1986, gah da 1989-cu il kimi göstərilib. Hazırda FİG-in saytında Hon Su Çjonun 9 mart 1989-cu ildə anadan olduğu göstərilib. Amma 2003-cü il Universiadasından öncə bu gimnastın təvəllüdü 9 mart 1985-ci il olub. Çjonun nə vaxt 1986-cı il təvəllüdlü idmançı kimi sifariş edildiyi isə məlum deyil.

KXDR gimnastının yaşı ilə bağlı maxinasiya faktı 16 – 24 oktyabrda Hollandiyanın Rotterdam şəhərində təşkil olunmuş dünya çempionatından az öncə aşkarlanıb. Noyabrın 7-də FİG KXDR gimnastlarını 30 gün müddətinə bütün yarışlardan kənarlaşdırıb, noyabrın 5-də isə onları 2 illik diskvalifikasiya edib. Cəza 6 oktyabrdan qüvvəyə minib və 5 oktyabr 2012-ci ildə başa çatacaq.

Qeyd edək ki, 2012-ci il London Yay Olimpiya Oyunları iyulun 27-dən avqustun 12-dək davam edəcək. KXDR yığmasının nümayəndələri 21 gün ərzində apellyasiya verə bilərlər. 2008-ci il Pekin olimpiadasında Şimali Koreya bir medal qazanıb. Qadınlar arasında keçirilən yarışda Hon U Çjon dayaqla tullanma növündə qızıl medala sahib çıxıb.