Zidan bacısını söyən futbolçu ilə barışdı
05 noyabr 2010 14:22 (UTC +04:00)

Zidan bacısını söyən futbolçu ilə barışdı

Lent.az-ın “Marca”ya istinadən verdiyi məlumata görə, bu, noyabrın 3-də Milandakı otellərdən birində baş verib.

Oteldə oyunçular təsadüfən görüşüblər. Zidanla Materatsi bir-biri ilə söhbətləşdikdən sonra qucaqlaşıblar. Fransa yığmasının sabiq yarımmüdafiəçisi hazırda “Real”ın prezidenti Florentino Peresin məsləhətçisi kimi çalışır. Noyabrın 3-də “kral klubu” İtaliyada “Milan” komandası ilə Çempionlar Liqası matçına çıxıb. İspaniya təmsilçisi ilə Milana yollananlar arasında Zidan da olub. Materatsi isə madridlilərin qaldığı otelə baş məşqçi Joze Mourinyo ilə görüşmək üçün gəlib. Hazırda “İnter”də çıxış edən müdafiəçi bu klubda iki ilədək Mourinyonun rəhbərliyi altında oynayıb.

Zidanla Materatsi əvvəlcə bir-biri ilə soyuq görüşüblər. Sonradan futbolçular bir müddət söhbətləşiblər və vida öncəsi qucaqlaşıblar. Onların söhbətinin məzmunu məlum deyil.

Qeyd edək ki, 2006-cı il dünya çempionatında İtaliya və Fransa milliləri arasında keçirilmiş final matçında Zinəddin Zidan Marko Materatsinin sinəsinə kəllə atdığı üçün meydançadan qovulub. Əsas vaxtı 1:1 hesabı ilə nəticələnən oyunun taleyinə penaltilər seriyasında aydınlıq gəlib. İtaliyalı futbolçular, o cümlədən Materatsi penalti zərbəsini daha dəqiq yerinə yetirərək, dördqat dünya çempionu olublar. Sonradan Zidan hərəkətini italiyalı rəqibinin onu təhqir etməsi ilə əsaslandırıb. Materatsi uzun müddət danışmasa da, yekunda fransalının bacısını təhqir etdiyini söyləyib və üzr istəyib.
# 531

Oxşar yazılar