“Neftçi”yə qol vuran futbolçu “Xəzər Lənkəran”dan qovuldu - FOTO

Lent.az-ın klubun rəsmi saytına istinadən verdiyi məlumata görə, tərəflər qarşılıqlı razılıq əsasında müqaviləni pozublar.

Vitse-prezidenti Tuyqun Nadirovun fikrincə, argentinalı futbolçu ona olan ümidləri doğrulda bilməyib: “Ruiz “Xəzər Lənkəran”da olduğu dövrdə yaxşı oyun göstərə bilmədi. Buna görə məşqçimiz onu əvəzedici heyətə göndərdi, ancaq Ruiz bundan imtina etdi. Onda biz düşündük ki, yaranmış vəziyyətdən ən yaxşı çıxış yolu müqaviləni qarşılıqlı pozmaqdır”.

Nadirov bildirib ki, nə Ruizin “Xəzər Lənkərana”, nə də klubun bu futbolçuya qarşı iradı var. Vitse-prezident argentinalı futbolçuya uğurlar arzulayıb: “Ola bilsin, hansısa ayrı klubda o daha yaxşı oynasın, lakin Ruiz bizdə üzərinə düşən vəzifəni yerinə yetirməyə qadir deyildi. İstənilən halda ona uğurlar arzu edirik”.

Qeyd edək ki, Dieqo Ruiz “Xəzər Lənkəran”a yeni baş məşqçi Mirça Rednikin istəyilə yayda transfer olub. O, “ağ-yaşıllar”ın heyətində 10 tur ərzində 2 qol vurub. Bunlardan biri VII turda “Neftçi” ilə oyuna təsadüf edib. Məhz Ruizin 90-cı dəqiqədə vurduğu qol sayəsində “Xəzər Lənkəran” qalib gəlib.