Berti Foqts və Vinfrid Şefer dünyanın ən yaxşı baş məşqçiləri siyahısında

Lent.az-ın qurumun rəsmi saytına istinadən verdiyi məlumata görə, ümumilikdə 211 mütəxəssisin yer aldığı siyahıya hazırda Azərbaycanda çalışan 2 baş məşqçi də daxil edilib.

Bunlar milli komandamıza rəhbərlik edən almaniyalı Berti Foqtsla onun “Bakı”dakı həmkarı və həmyerlisi Vinfrid Şeferdir. 43 xala malik Foqts Lui van Qalla (“Bavariya”) birgə 34-cü yerdə qərarlaşıb. O, mərhum Valeri Lobanovskidən cəmi 1 xal və 1 pillə geridədir. Əvəzində Foqts Yoahim Löv (Almaniya millisi), Fatih Terim, Raymon Domenek, Ziko, Mirça Luçesku (“Şaxtyor”, Ukrayna), Şenol Günəş (“Trabzonspor”, Türkiyə) kimi mütəxəssisləri geridə qoyub.

Aktivində 22 xal olan Şefer isə Bert van Marviyk (Hollandiya millisi) və Serxio Markaryan (Peru millisi) ilə birgə 76-cı yeri tutur.

Qeyd edək ki, siyahıya 207 xalla Aleks Ferqyuson (“Mançester Yunayted”, İngiltərə) başçılıq edir. Arsen Venger (“Arsenal”, İngiltərə) 172 xalla 2-ci, Marçello Lippi (İtaliya, işsiz) 146 xalla 3-cü, Qus Hiddink (Türkiyə millisi) 141 xalla 4-cü, Luis Felipe Skolari (“Palmeyras”, Braziliya) isə 133 xalla 5-ci pillədədir.