Qalmaqallı futbolçuya daha bir cəza

“Olimpik” klubu Mahir Şükürovu əvəzedici komandaya göndərdi

Bakının “Olimpik” klubunun rəhbərliyi müdafiəçi Mahir Şükürovu cəzalandırıb. Bu haqda Lent.az-a klubun mətbuat xidmətinin rəhbəri Eldəniz Yusifov məlumat verib.

Onun sözlərinə görə, bu gün keçirilən klubdaxili iclasda Azərbaycan milli komandasının müdafiəçisi barədə ölçü götürülməsi barədə qərar verilib. Şükürovun “Bakı” ilə Azərbaycan Premyer Liqasının XX tur matçında ədalətli oyun qaydalarına və nizam-intizama əməl etməməsi “Olimpik” rəhbərliyinin kəskin narazılığına səbəb olub. Baş məşqçi Əsgər Abdullayevin istəyilə Şükürov bir neçə oyunluq əvəzedici komandaya keçirilib. Bununla yanaşı, 27 yaşlı müdafiəçi müəyyən miqdarda cərimə edilib.

Qeyd edək ki, “Bakı” ilə qarşılaşmanın 19-cu dəqiqəsində Mahir Şükürova göstərilən sarı vərəqə AFFA İntizam Komitəsinin qərarına əsasən, qırmızı vərəqə ilə əvəzlənib. Futbolçunun özü 2 oyunluq cəzalandırılıb, “Olimpik” isə 2000 manat cərimə olunub. 51-ci dəqiqədə isə “Olimpik”in futbolçusu Junivan Suares “Bakı”nın cərimə meydançasında yerə yıxılıb. Bunu görən “Bakı”nın futbolçuları topu auta atıblar. “Olimpik” və milli komandamızın müdafiəçisi Mahir Şükürov isə topu “Bakı”ya qaytarmaq əvəzinə hücuma başlayıb. Onun ötürdüyü topu Junivan Suares qapıdan keçirib. Sonrakı dəqiqələrdə “Olimpik” daha bir dəfə fərqlənib və “Bakı”nı 2:1 hesabı ilə məğlubiyyətə uğradıb.