Azərbaycanlı hakimi stadiondan yanğınsöndürən maşınla çıxarıblar

Rüstəm Rəhimov 1991-ci ildə böyük qalmaqalın səbəbkarı olub

Azərbaycanın keçmiş ümumittifaq dərəcəli futbol hakimi Rüstəm Rəhimovla bağlı görünməmiş qalmaqal ortaya çıxıb.

Lent.az-ın “sport.oboz.ua” saytına istinadən məlumatına görə, R.Rəhimov 1991-ci il aprelin 21-də Ukraynanın Donetsk şəhərində yerli “Şaxtyor” və Rusiyanın MOİK komandaları arasında keçirilmiş SSRİ çempionatının birinci dövrəsinin oyununda nəticəyə təsir edən səhvə yol verib.

Görüşün başa çatmasına 1 dəqiqə qalmış həmyerlimiz “Şaxtyor”un qapısına penalti zərbəsi təyin edib. O, MOİK-in forvardı İqor Korneyevə qarşı olmayan “fol”u qayda pozuntusu kimi dəyərləndirib və meydan sahiblərini 11 metrlik cərimə zərbəsi ilə cəzalandırıb. “Hərbçilər” bu imkandan yararlanıblar və qarşılaşma 1:1 hesabı ilə nəticələnib.

Oyundan sonra donetskli azarkeşlər rəqib komandanın futbolçuları və R.Rəhimovun rəhbərlik etdiyi hakimlər briqadası ilə uzun müddət münasibətlərini aydınlaşdırıblar. “Şaxtyor”un veteran futbolçusu İqor Petrov həmin hadisəni belə xatırlayır: “Oyun gərgin mübarizə şəraitində keçdi. Matçın sonlarında hakimin səhvi azarkeşləri təxribata çəkdi. Nəticədə çaxnaşma başladı. Hakimi oyundan yanğınsöndürən maşınla çıxarmaq lazım gəldi. Mənim yaddaşımda bundan böyük qalmaqal olmayıb”.

Petrovun sözlərinə görə, qalmaqal təkcə stadionu əhatə etməyib. Qəzəblənmiş azarkeşlər Donetskin küçələrinə axışaraq, dayanacaqlardakı avtobus və avtomobilləri əzərək, şüşələrini sındırıblar. Veteran futbolçu sona 10 dəqiqə qalmış əvəzləndiyi üçün mübahisəli epizod zamanı meydançada olmadığını deyib. O, final fitindən sonra bir saat ərzində stadionu heç kimin tərk edə bilmədiyini xatırladıb. Məsələyə atlı milislər qarışıblar: “Biz az vaxt idi ki, qonaq komandalar üçün avtobus almışdıq. Həmin avtobusu azarkeşlər daşa basaraq, şüşələrini sındırdılar. Sürücü şokda idi”.

Elşən Məmmədov