Useyn Bolt “Mançester Yunayted”də futbol oynamaq istəyir

Lent.az-ın “tribalfootball.com”a istinadən verdiyi məlumata görə, bu fikirləri 100 və 200 metr məsafələrə qaçış üzrə dünya rekordçusu Useyn Bolt özü haqda yazdığı avtobioqrafiyada qeyd edib.

24 yaşlı idmançı ümid edir ki, “qırmızı şeytanlar”ın baş məşqçisi Aleks Ferqyuson yoldaşlıq görüşlərindən birində ona şans verə bilər. Boltun sözlərinə görə, çoxları onun “Mançester Yunayted”in əsas heyətinə düşə biləcəyinin real olmadığını söyləyir. Amma həmin insanlar dünyanın ən sürətli insanının necə oynadığını bilmirlər. Yamaykalı sprinterin fikrincə, Ferqyuson onun oyununu gördükdən sonra komandanın veteranı Rayan Giqqzə uğurlu əvəzedici kimi yararlana bilər.

Qeyd edək ki, 100 metrlik məsafəyə qaçışda göstərdiyi 9,58 saniyə nəticənin şərəfinə “Useyn Bolt: 9,58” adlanan avtobioqrafiya 2 hissədə çıxacaq. Birinci hissə 2010-cu ilin oktyabrında dərc olunacaq. İkinci kitab isə 2012-ci il London Yay Olimpiya Oyunlarından sonra satışa çıxacaq.