Tunar Rəhmanoğlu: ”Bu, mənə qarşı tələ idi...”

“On gün həbsdə qalmaq asan deyildi. Ailəm və azadlığım üçün çox darıxırdım. Amma etiraf edim ki, həbsdən çıxanda sevinmədim. Çünki bu olmamalıydı, mən həyatımda belə bir hadisə yaşamamalıydım”.

Bunu həbsdən azad edilən müğənni Tunar Rəhmanoğlu deyib.

Həbsdən sonra ilk açıqlamasını verən Tunar onun barəsində çıxarılan qərarla razılaşmayıb: “Mənim heç bir günahım yox idi. Bu, mənə qarşı əvvəlcədən hazırlanmış tələ idi. Məni oyuna gətirdilər. Bu haqda yaxın günlərdə ətraflı açıqlama verəcəyəm”.

Xatırladaq ki, Tunar mayın 4-də polisin qanuni tələbinə məhəl qoymayaraq idarə etdiyi avtomobilin sənədlərini inspektora təqdim etməyib. Bu zaman yol polisi əməkdaşları ilə müğənni arasında insident yaşanıb. Daha sonra hadisə yerinə gələn Post Patrul Xidməti əməkdaşları müğənnini saxlayaraq barəsində inzibati tədbir görülməsi üçün məhkəməyə aparıb. Məhkəmə isə onun barəsində 10 sutka həbs və bir il müddətinə sürücülük hüququndan da məhrum olunması barəsində qərar qəbul edib.

Müğənni ötən gün həbsdən azad olunub.

Axşam.az