Sahibkarın 26 min manatını aparanlar tutuldu

Ağcabədi rayonunda iş adamına məxsus 26 min manat pulu oğurlamış şəxslər həbs olunub. Rayon Polis Şöbəsindən Lent.az-a verilən məlumata görə, Heydərov Sabir Məmməd oğluna məxsus “Niva” markalı avtomobildən külli miqdarda pulu oğurlamış şəxslər - 1985-ci il təvəllüdlü Sabbaqi Ramil Ramazan oğlu, 1986-cı il təvəllüdlü Cəfərov Yusif Asif oğlu və 1987-ci il təvəllüdlü Quliyev Zamiq Vaqif oğlu müəyyən edilib. Hər 3 şəxs yaxalanıb.

Araşdırmalar nəticəsində məlum olub ki, S.Heydərov iş adamıdır və qeyd olunan şəxslər onun külli miqdarda pul aparmasını biliblər. Plana əsasən, Y.Cəfərov S.Heydərov avtomobili yaşadığı evin qarşısında saxlayarkən ona yaxınlaşıb. Başına maska keçirən 27 yaşlı oğlan qəfil maşına girərək pulu götürüb və digər yoldaşlarının köməyi ilə qaçıb.

Faktla əlaqədar cinayət işi başlanılıb, araşdırma aparılır.