Milli komandanın futbolçusu zorlamaya görə tutuldu

Fransa milli komandasının və İngiltərənin KPR klubunun futbolçusu Loik Remi Londonda həbs olunub. Lent.az-ın “The Daily Mail”ə istinadən verdiyi məlumata görə, 26 yaşlı hücumçudan əlavə, onun əmioğlusu və dostu da saxlanılıb.

Onlar adı açıqlanmayan 34 yaşlı qadının polisə şikayəti əsasında tutulublar. Həmin qadın bildirib ki, mayın 6-da Reminin mənzilində futbolçunun əmioğlusu və dostu ilə birgə olub. Qadın onlardan birinin təklifi ilə alkoqol qəbul edib və huşunu itirib. Güman edilir ki, qadın huşsuz vəziyyətdə ikən zorlanıb. Şübhəli şəxslər şikayətdən bir həftə sonra saxlanılıblar. Hazırda onlar polis idarəsindədirlər.

Qeyd edək ki, Loik Remi KPR-ə yanvarda Fransa “Marsel”indən keçib. Artıq bu klubun Premyer Liqanı tərk edəcəyi dəqiqləşib. Remi Fransa millisində 19 oyuna 4 qol vurub.