Fransada Hafiz Məmmədovun klubuna qoyulan qadağa götürüldü

Fransa Futbol Federasiyasının (FFF) Apellyasiya Komissiyası “Lans” klubuna qoyulan transfer qadağasını götürüb. Lent.az-ın klubun rəsmi saytına istinadən məlumatına görə, “sarı-qırmızılar”a qış transfer dövründə istənilən futbolçunun keçidini həyata keçirməyə icazə verilib.

Bu, klubun səhmdarının “Lans”ın hesabına lazımi məbləğdə vəsaiti köçürməsinə dair sənədləri təqdim etməsindən sonra mümkün olub.

Qeyd edək ki, transfer qadağasını “Lans”a Fransanın Peşəkar Klublara Nəzarət Komissiyası (DNCG) yanvarın 7-də tətbiq edib. Problem Fransa klubunun hesabına köçürülən vəsaitin bank sübutunun olmamasından qaynaqlanıb. Azərbaycanlı iş adamı Hafiz Məmmədov ötən ilin iyulunda “Lans”a sahib olarkən, kluba ilkin mərhələdə 5 milyon avro, bu ilin iyunun 30-dək isə 6 milyon avro köçürməli idi. Amma klub 6 milyon avronu fevraldan etibarən köçürülməyə başlanmasını, DNCG isə bu ödəmələrə zəmanət verilməsini xahiş edib. “Sarı-qırmızılar” köçürmələrin bank sübutları üçün əlavə bir neçə sənəd də təqdim ediblər.