Nazir müavininin adından istifadə edən şəxs: "Ona deyin, məndən kitab yazsın"

Bakıda vəzifəli şəxslərə qarşı dələduzluqda təqsirləndirilən Alim İbrahimov və Tərlan Comərdov cinayət işi üzrə məhkəmə davam edib.

Lent.az-ın məlumatına görə, Bakı Ağır Cinayətlər Məhkəməsində hakim Rahib Salamovun sədrliyi ilə keçirilən prosesdə zərərçəkmiş şəxs qismində Adil Həsənov dindirilib.

Adil Həsənov deyib ki, bina tikintisi ilə məşğul olub: “Tərlan dostumun tanışı idi. Ev tikərkən vergi ödənişləri ilə bağlı problemlər yarandı. Tərlana müraciət etdik. O, bu işi həll edə biləcəyini dedi. Biz qanun çərçivəsində işlərin həll olunmasının tərəfdarıydıq. Bizim başımız çıxmırdı, ona görə Tərlana güvəndik. O, məni bir nəfərlə tanış elədi. Dedi ki, bu, vergilər nazirinin müavininin müşaviridir. Bütün vergi söhbətlərini həll edəcək. İnanıb, ümumilikdə 123 min pul vermişəm”.

Təqsirləndirilən şəxs Alim İbrahimov zərərçəkmişin ifadəsi zamanı gülərək “imkan olsa, yazıçı Çingiz Abdullayevə deyin, məndən kitab yazsın” deyib.

Adil Həsənovdan sonra zərərçəkmiş şəxs qismində Fikrət İbrahimov da ifadə verib.

O bildirib ki, hüquq-mühafizə orqanlarının sabiq əməkdaşı olub. F. İbrahimov təqsirləndiriləndən Alim İbrahimovu tanıdığını deyib: “Mən onu tanıyanda özünü mənə çox yüksək vəzifəli şəxsin mühafizəçilərinin rəisi kimi təqdim etdi. Mən də düşündüm ki, ondan xahiş edim, həmin şəxsin tikinti şirkətinə lazım olan qapı-pəncərələri bizdən alsınlar. Bu da razılaşdı. Ondan şübhələnmədim. Çünki çox suallar verirdim, bəzi adamlar haqda soruşurdum. Elə konkret və dəqiq cavablar verirdi ki, inanmırdım ki, yalan desin. Alimə 94 minlik tikinti malları verdim. Pulumu vermədi. Vaxt keçdi, Alim aradan çıxdı. Sonradan dost-tanış vasitəsi ilə onu tapdım. Pulun bir hissəsini geri aldım. Mənə 28 min borcu qaldı”.

Təqsirləndirilən Alim İbrahimov bildirib ki, zərərçəkənin dediklərinin hamısı doğrudur: “Məqsədim malı satıb pul qazanmaq idi. Malı Məşhəddə tanış olduğum Elçin Həmidova vermişəm. Özüm də qazanc əldə edəcəkdim. Ancaq Elçin pulun qalanını vermədi. Mən də onu məhkəməyə vermişəm. Məhkəmə qərar çıxarıb ki, Elçin mənə dəymiş ziyanı ödəsin. Ancaq qərar icra olunmur. Həbs edildim, pulu ala bilmədim”.

Məhkəmə noyabrın 10-da davam edəcək.

Qeyd edək ki, hər iki şəxs Feyzulla Qasımova, Fikrət Qurbanova, Aydın Həsənova və Həsən Yaqubova qarşı dələduzluq etməkdə təqsirli bilinirlər. T.Comərdov və A.İbrahimov Cinayət Məcəlləsinin 178.3.2-ci (dələduzluq, külli miqdarda) maddəsi ilə ittiham olunub. Zərərçəkmişlərdən biri Feyzulla Qasımov Baku Medical Plazada baş həkimin müavinidir.