"Bomj" yoldaşını öldürən şəxs apellyasiya şikayəti verdi

Bakı Apellyasiya Məhkəməsində qətl törətməkdə təqsirli bilinərək həbs edilən Vadim Mixayloviç Naumovun şikayəti üzrə məhkəmənin ilkin baxış iclası keçirilib. Lent.az-ın məlumatına görə, hakim İlqar Murquzovun sədrliyi ilə keçirilən prosesdə təqsirləndirilən şəxsin anket məlumatları dəqiqiləşdirilib. Məhkəmə baxışı mayın 14nə təyin edilib.

Qeyd edək ki, qətl keçən il sentyabrın 25-də Nərimanov rayonu Ağa Nemətulla küçəsi 23-də baş verib. Həmin ünvanın qarşında daimi yaşayış yeri olmayan və küçələrdə tüfeyli həyat tərzi keçirən Vadim Naumov digər "bomj"u, Rauf Hacıyevi döyüb, sonra isə boğaraq öldürüb.

Bakı Ağır Cinayətlər Məhkəməsində hakim Ənvər Seyidovun sədrliyi ilə keçirilən prosesdə V. Naumov 17 il müddətinə azadlıqdan məhrum edilib. Hökmlə razılaşmayan V. Naumov apellyasiya şikayəti verib.