Azərbaycanda qırğın kimi gecə: 15 ölü, 33 yaralı

Son sutka ərzində Azərbaycanda baş vermiş yol qəzaları nəticəsində rekord sayda – 15 nəfər həlak olub. Baş Dövlət Yol Polisi İdarəsinin şöbə rəisi Kamran Əliyevin Lent.az-a verdiyi məlumata görə, baş vermiş 14 yol-nəqliyyat hadisə səbəbindən daha 33 nəfər müxtəlif dərəcəli bədən xəsarətləri alıb.

Bakı-Quba magistralında, Sumqayıt şəhərində 3 avtomobilin toqquşması nəticəsində 5 nəfər ölüb, daha 5 insan isə yaralanıb. Bundan başqa Quba və Sumqayıtda baş vermiş digər iki hadisənin hər birində 2 nəfər həlak olub. Qaradağ, Göyçay, Şəmkir rayonlarında da ölümlə nəticələnən yol qəzaları baş verib.

Dünən Bakıda 5 yol qəzası olub və 6 nəfər yaralanıb. Hadisələrin 4-də piyadalar vurulub. Digər hadisə isə Xəzər rayonunda iki avtomobilin toqquşması nəticəsində baş verib və 2 nəfər xəsartə alıb.

Kamran Əliyev bildirib ki, hadisələrin əksəriyyəti sürət həddinin aşılması nəticəsində baş verir: “Sürücülər heç olmasa bu rəqəmlərdən nəticə çıxarsın. Yüksək sürət bir məqam olur ki, qəzaya gətirib çıxarır və həmin an artıq gec olur”.