Azərbaycan turizm şirkətinin direktorunu beynəlxalq axtarışa verib

Azərbaycanda şirkət rəhbəri barəsində axtarış elan olunub.

APA-nın məlumatına görə, bu barədə İnterpolun saytında məlumat yerləşdirilib.

Məlumatda qeyd olunur ki, 1981-ci il təvəllüdlü Elnur Əliyev dələduzluqda təqsirləndirilir. O, Azərbaycandan qaçdığı üçün barəsində dövlətlərarası axtarış elan olunub və saxlanılması üçün İnterpola müraciət edilib.

APA-nın əldə etdiyi məlumata görə, Elnur Əliyev Bakıda fəaliyyət göstərən “İnter Travel” turizm şirkətinin direktorudur. Onun bir qrup vətəndaşa qarşı dələduzluq etməsi ilə bağlı bu ilin yayında polisə ərizə daxil olub. Ərizədə iddia olunur ki, cari ilin fevral-iyul aylarında İ. Əliyev etibardan sui-istifadə edərək İran İslam Respublikasının vətəndaşı Taleh Kərim oğlu Mahmmouididən 4500 manat alaraq qaytarmayıb. Bundan başqa, Bakı şəhər sakini, 1973-cü il təvəllüdlü Səməd Hacı oğlu Əzizovdan 2800 manat, 1982-ci il təvəllüdlü İsa Ənvər oğlu Əliyevdən 3600 manat, İradə Valeh qızı Quliyevadan 3268 manat, 1983-cü il təvəllüdlü Rauf Vidadi oğlu Xəlilovdan 1470 manat, 1991-ci il təvəllüdlü Günel Əbdülhüseyn qızı Gülhüseynovadan 1700 manat, 1971-ci il təvəllüdlü Xaliq Ramazan oğlu Bağırovdan 4500 manat, 1990-cı il təvəllüdlü Elman Bəylər oğlu Xanlarovdan 4200 manat, 1980-ci il təvəllüdlü Ağa Əli oğlu Abbasovdan 5200 manat, Xırdalan şəhər sakini, Fərhad Kərimovdan 1500 manat alaraq verməyib.