"Lotu Quli"nin vəkilinin şikayəti təmin edilmədi - YENİLƏNİB

Ali Məhkəmədə həbsdə olan kriminal avtoritetə telefon keçirməkdə təqsirli bilinən məşhur vəkil Kamandar Rəfi oğlu Nəsibovun məhkəmə qərarından verdiyi kasasiya şikayətinə baxılıb.

Lent.az-ın məlumatına görə, hakim Gülzar Rzayevanın sədrliyi ilə keçirilən prosesdə kamandar Nəsibovun kasasiya şikayəti üzrə qərar elan edilib. Qərara görə, Kamandar Nəsibovun kasasiya şikayəti təmin edilməyib.

Qeyd edək ki, 8 saylı cəzaçəkmə müəssisəsində cəza çəkən məhkum Nadir Nəriman oğlu Səlifovla görüşə gəlmiş vəkili Kamandar Rəfi oğlu Nəsibovun üzərinə baxış keçirilən zaman ondan daxilində “Azercell” danışıq kartı olan 1 ədəd “Huawei” markalı modem aparatı aşkar edilərək götürülüb.

Nadir Səlifov Cinayət Məcəlləsinin 182.3.1; 182.3.2; 29.149.2.1; 29.149.2.4; 29.149.2.5; 317-2.1 və 67 maddələri ilə təqsirli bilinərək azadlıqdan məhrum edilib. Kamandar Nəsibovun barəsində Cinayət Məcəlləsinin 29, 317-1.1-ci (cəzaçəkmə müəssisələrində və ya istintaq təcridxanalarında saxlanılan şəxslərə qadağan olunmuş əşyaların yoxlamadan gizlətməklə və ya hər hansı digər üsulla verilməsi və ya ötürülməsinə cəhd) maddəsi ilə ittiham edilib.

Qaradağ rayon Məhkəməsinin hökmü ilə Kamandar Nəsibova cərimə cəzası kəsilib. Hökmdən narazı qalan Kamandar Nəsibov apelyasiya şikayəti verib. O, barəsində bəraət hökmünün çıxarılmasını istəyib.

Hakim Vüqar Məmmədovun sədrliyi ilə keçirilən prosesdə Kamandar Nəsibovun apelyasiya şikayətinə məhkəmə istintaqı ilə baxılmasını istəyib. Lakin məhkəmə Kamandar Nəsibovun şikayətini təmin etməyib və apelyasiya şikayətinə məhkəmə istintaqı aparılmadan baxılması barədə qərar qəbul edib. Kamandar Nəsibov məhkəmənin ilkin baxış iclası qərarının ləğv edilməsi barədə kasasiya şikayəti verib.