[b]Şahidlər həbsdə olan keçmiş deputatın əleyinə ifadə verib[/b]

Beynəlxalq Bankdan pul götürüb qaytarmamaqda təqsirləndirilən sabiq deputat Dünyamin Xəlilov və digərlərinin cinayət işi üzrə məhkəmə davam edib.

Lent.az-ın məlumatına görə, Bakı Ağır Cinayətlər Məhkəməsində hakim Əhməd Quliyevin sədrliyi ilə keçirilən prosesdə şahidlər dindirilib.

Şahid qismində dindirilən "İntertekstil" şirkətinin əməkdaşı Paşa Namazov ifadəsində qeyd edib ki, bankdan kredit götürmək üçün sənədləri imzalamaq tələb edilib. Onlara bildiriblər ki, şirkətə pul lazımdır.

Digər şahid Bayram Əliyev ifadəsində Paşa Namazovla eyni şirkətdə çalışdığı və rəhbərliyin göstərişi ilə sənədlərə qol çəkdiyini deyib: "Dedilər, fabrikə kömək etmək üçün kredit götürmək lazımdır. Biz də deyilənləri etdik".

Prosesdə dindirilən Şahin Qulamov adlı şahid isə Dünyamin Xəlilovun göstərişi ilə banka gedib sənədlərə qol çəkib: "Bizə baş mühasib dedi ki, Dünyamin müəllim bununla bağlı göstəriş verib. Biz də gedib imzaladıq".

Bundan əlabə bir neçə şahid eyni məzmunlu ifadələr verib.

Proses martın 9-da davam edəcək.

Qeyd edək ki, 2015-ci ilin yayından Beynəlxalq Banka kredit borcları olan şəxslərin həbsinə başlanılıb. Bu məsələ ilə bağlı bir çox iş adamı saxlanılıb. "Globus Plaza"nın sahibi olan D. Xəlilov da dələduzluqda təqsirli bilinir. O, ötən ilin fevralında Daxili İşlər Nazirliyi Baş Mütəşəkkil Cinayətkarlıqla Mübarizə İdarəsi əməkdaşlarının həyata keçirdiyi əməliyyat zamanı saxlanılaraq, Nərimanov Rayon Məhkəməsinin qərarı ilə barəsində həbs qətimkan tədbiri seçilib. D. Xəlilov Cinayət Məcəlləsini 178.3.2-ci (dələduzluq, külli miqdarda törədildikdə) maddəsi ilə ittiham olunur.

Digər təqsirləndirilən şəxslər isə Fərhad Əmiraslanov, Seyfulla Seyfullayev, Şakir Musayev, Ruslan İsmayılov, Mənsur Zeynalov, Rauf Əliyevdir. Dünyamin Xəlilovdan başqa digərlərinin barələrində həbs qətimkan tədbiri seçilməyib. Onlar ümumilikdə 50 milyon manat mənimsəməkdə təqsirləndirilirlər.