[b]Məhkəmə Əli İnsanovu azadlığa buraxmadı[/b]

Sabiq səhiyyə naziri Əli İnsanovun ev dustaqlığına buraxılması ilə bağlı birinci instansiya məhkəməsinin qərarından verdiyi şikayətə baxılıb.

Bu barədə Lent.az-a onun vəkili Toğrul Babayev məlumat verib.

Vəkil bildirib ki, Bakı Apellyasiya Məhkəməsində keçirilən prosesdə Əli İnsanovun şikayəti təmin edilməyib. Qaradağ rayon Məhkəməsinin qərarı dəyişdirilmədən saxlanıb.

Xatırladaq ki, bir müddət əvvəl Əli İnsanov Qaradağ rayon Məhkəməsinə müraciət edərək barəsində seçilən həbs qətimkan tədbirinin dəyişdirilərək ev dustaqlığına buraxılması istəmişdi. Qaradağ rayon Məhkəməsi isə onun tələbini təmin etməyib.

Qeyd edək ki, Ə.İnsanov 2005-ci ilin oktyabr ayında həsb edilib. O, dövlət vəsaitlərinin mənimsənilməsində və dövlət aktivlərinin qanunsuz özəlləşdirilməsinin təşkilində ittiham olunub. 2007-ci ilin aprel ayında Ə.İnsanov Bakı Ağır Cinayətlər Məhkəməsinin hökmü ilə əmlakı müsadirə olunmaqla və 3 il ərzində dövlət vəzifəsi tutması qadağan edilməklə 11 il müddətinə azadlıqdan məhrum olunub.

Ötən il il avqustun 24-də Ə.İnsanova Cinayət Məcəlləsinin (CM) üç maddəsi ilə ittiham irəli sürülüb. Sabiq nazir CM-nin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama), 315.2-ci (hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olmayan zor tətbiq etməklə müqavimət göstərmə, xidməti vəzifələrini yerinə yetirməsi ilə əlaqədar ona və ya onun yaxın qohumlarına qarşı belə zor tətbiq etmə və ya zor tətbiq etmə hədəsi ilə hədələmə, bu maddədə göstərilən şəxslərə qarşı həyat və sağlamlıq üçün təhlükəli olan zor tətbiq etmə) və 317-2.1-ci (cəzaçəkmə müəssisələrində və ya istintaq təcridxanalarında saxlanılan şəxs tərəfindən qadağan olunmuş əşyaların hazırlanması, saxlanılması, gəzdirilməsi, daşınması və ya istifadəsi, eyni əməllər təkrar törədildikdə) maddələri ilə ittiham olunur.

Qaradağ Rayon Məhkəməsində onun barəsində üç ay müddətinə həbs qətimkan tədbiri seçilib. Daha sonra onun həbs müddəti uzadılıb.