Dəhşətli qəza törədən 13 yaşlı oğlan iş adamının oğlu imiş - YENİLƏNİB

Bu gün Şirvan şəhərində baş vermiş dəhşətli yol qəzasının bəzi məqamları aydın olub. Lent.az-ın əldə etdiyi məlumata görə, 13 yaşlı Elxan Abdulov atasına məxsus avtomobili icazəsi götürüb və yüksək sürətlə hərəkət edərkən ağır qəza törədib. Məlumata görə, yeniyetmənin atası şəhərdə sayılıb-seçilən iş adamlarındandır. Hadisə isə bu gün sübh çağı baş verib. Şirvan şəhər Polis Şöbəsindən APA-nın Mil-Muğan bürosuna verilən məlumata görə, hadisə bu gün saat 07.00 radələrində qeydə alınıb. “Mercedes” markalı, 90 HD 826 dövlət nömrə nişanlı avtomobilin ağaca çırpılması nəticəsində sürücü, 2000-ci il təvəllüdlü Abdulov Elxan Elşən oğlu hadisə yerində dünyasını dəyişib. Avtomobildə olan 1997-ci i təvəllüdlü Məmmədov Cəbrayıl Vüqar oğlu açıq kəllə-beyin travması alaraq ağır vəziyyətdə Şirvan şəhər Xəstəxanasının reanimasiya şöbəsinə yerləşdirilib. Yaralını və meyiti avtomobildən FHN əməkdaşları çıxarıb.

Faktla bağlı Şirvan şəhər Polis Şöbəsi tərəfindən araşdırma aparılır.

***

10:20

Bu gün Şirvan şəhərində dəhşətli yol-nəqliyyat hadisəsi baş verib.Lent.az-ın Fövqəladə Hallar Nazirliyinin saytına istinadən verdiyi məlumata görə, sahibi məlum olmayan 2000-ci il təvəllüdlü Abdulov Elxan Elşən oğlu tərəfindən idarə olunan "Mercedes" markalı minik avtomobili ağaca çırpılıb. Nəticədə E.Abdulov aldığı ağır bədən xəsarətlərindən hadisə yerində vəfat edib və avtomobildə olan şəxsiyyəti məlum olmayan digər sərnişin ağır bədən xəsarətləri ilə yanğınsöndürən-xilasedicilər çatana kimi əhali tərəfindən Şirvan şəhəri mərkəzi xəstəxanasına aparılıb.

Avtomobildə sıxılmış vəziyyətdə qalmış meyit isə yanğınsöndürən-xilasedicilər tərəfindən müxtəlif alətlərdən istifadə olunmaqla avtomobildən çıxarılaraq aidiyyatı üzrə təhvil verilib. Əməliyyat səhər saat 07:17-də başa çatıb.

Hadisə ilə əlaqədar müvafiq hüquq-mühafizə orqanları tərəfindən təhqiqat aparılır.