"Tağı Əhmədov məni YAP-ın binasında döyüb" - Məhkəmədə ŞOK İFADƏ

Azərbaycan Milli Elmlər Akademiyasının (AMEA) Riyaziyyat və Mexanika İnstitutunun direktor müavini, professor Soltan Əliyevə qarşı dələduzluqda ittiham olunan Səadət Xəlilovun cinayət işi üzrə məhkəmə prosesi davam etdirilir.

Lent.az-ın APA-ya istinadla xəbərinə görə, Bakı Ağır Cinayətlər Məhkəməsində hakim Zeynal Ağayevin sədrliyi ilə keçirilən prosesdə Səadət Xəlilovun vəkili Hafiz Ələsgərov vəsatət qaldıraraq “Bakı Metropoliteni” QSC-nin keçmiş rəisi Tağı Əhmədovun məhkəməyə çağırılaraq dindirilməsini istəyib. Vəkil, həmçinin Səadət Xəlilovla Tağı Əhmədov arasında telefon danışıqlarının məhkəmədə araşdırılmasını xahiş edib.

Daha sonra təqsirləndirilən Səadət Xəlilov vəkilinin suallarını cavablandırıb. O, mərmər biznesilə məşğul olduqlarını, Qazaxıstan və İrandakı biznes tərəfdaşlarıyla iş gördüklərini deyib: "Qazaxıstanda Kənan Əliyev adlı şəxslə işləyirdik. O, Qazaxıstanda mal göndərdiyimiz firmanın sahibi idi. Onun Bakıda problemi vardı, ona görə bura gələ bilmirdi. Tağı Əhmədova da bu barədə məlumat vermişdim. Sonra Qazaxıstanda Kənanın əmlakını əlindən almışdılar”.

Cinayət işində zərərçəkmiş qismində Soltan Əliyev tanınıb. İttihama əsasən, Səadət Xəlilov, Qulu Muxtarov və Sahil Abuşov onun 2 milyon manatını ələ keçirib. Səadət Xəlilov həbsdə olsa da, digər iki təqsirləndirilən məhkəmə dövründə azadlıqda olublar. Ötən ilin dekabr ayında keçirilən məhkəmə iclaslarına gəlmədiklərinə görə onlar haqqında axtarış elan edilərək hər ikisi həbs edilib. Bundan sonra Qulu Muxtarov və Sahil Abuşovun işi Səadət Xəlilovun işindən ayrılıb. Səadət Xəlilov hazırda tək mühakimə olunur.

Səadət Xəlilov ifadisndə bildirib ki, 2 milyon manat Soltan Əliyevin yox, Tağı Əhmədovundur. Həmin pulu Metropolitenin sabiq rəisi onlara faizlə verib. Onun sözlərinə görə, əvvəlcə T. Əhmədovdan 200 min, sonra 800 min, daha sonra 1 milyon olmaqla, üç dəfəyə 2 milyon manat sələmlə pul alıb, bir neçə dəfə də buna görə faiz ödəyib. Mərmər biznesində uğursuzluqlar başlayandan sonra isə pulu ödəməkdə çətinlik çəkib. Bu səbəbdən dəfələrlə Tağı Əhmədovun həm özü, həm də yaxınları tərəfindən döyüldüyünü deyən Səadət Xəlilovun sözlərinə görə, əlində bunu təsdiqləyən sübutları da var. Onun sözlərinə görə, Tağı Əhmədov onu YAP-ın Yasamal rayon təşkilatının binasında döyüb. Həmin vaxt o, təşkilatın sədri olub.

Səadət Xəlilov özü də Tağı Əhmədovun məhkəməyə çağırılmasını istəyib.

Məhkəmə vəsatəti təmin etməyib.

Prosesdə Tağı Əhmədovun istintaqa verdiyi ifadəsi elan edilib. T.Əhmədov ifadəsində bildirib ki, pulu Səadət Xəlilova yox, dostu Soltan Əliyevə borc verib. O isə Səadət Xəlilova birgə biznes məqsədilə verib: “Mən onların işinə qarışmamışam, maraqlanmamışam”.

Qeyd edək ki, təqsirləndirilən şəxs Cinayət Məcəlləsinin 178.3.2 (külli miqdarda ziyan vurmaqla dələduzluq) maddəsi ilə ittiham olunur.