“Mercedes” Bakının mərkəzində divara çırpıldı, 2 qadın...

Bakının Nəsimi rayonunda yol-nəqliyyat hadisəsi baş verib.

Lent.az APA-ya istinadla xəbər verir ki, qəza 28 May və Rəşid Behbudov küçələrinin kəsişməsində qeydə alınıb.

Zahirə Həsənova idarəetməsində olan “Mercedes” markalı maşınla Rəşid Behbudov küçəsində hərəkətdə olarkən qarşısına maneə çıxıb. Bu zaman Zahirə Həsənova sükana nəzarəti itirib. Maşın əvvəlcə ödəmə terminalına, daha sonra 28 May və Rəşid Behbudov küçələrinin kəsişməsində olan binanın divarına çırpıb. Zərbənin gücündən avtomobildə olan sərnişin Günel Bayramova və sürücü Zahirə Həsənova ağır xəsarətlər alıblar. Nəqliyyat vasitəsi ciddi deformasiyaya uğrayıb.

Hadisə yerinə Təcili Tibbi Təxirəsalınmaz Yardım Xidmətinin briqadası cəlb edilib. Həkim bildirib ki, Günel Bayramova çanaq sümüyünün sınığı, sürücü isə qol sümüyünün sınığı diaqnozu ilə Respublika Klinik Xəstəxanasına yerləşdirilib.

Hadisə ilə bağlı Nəsimi rayon Polis İdarəsinin əməkdaşları araşdırma aparır.