Dəniz kənarını hasarlayan şirkət rəhbərliyinə cinayət işi açıldı

Azərbaycanda şirkətin vəzifəli şəxslərinin qanunsuz əməlləri ifşa olunub.

Baş Prokurorluqdan Lent.az-a verilən xəbərə görə, Xaçmaz rayonu, Sərəkli kəndi ərazisində yerləşən gölün ətrafını “Az Fish” Məhdud Məsuliyyətli Cəmiyyətin balıqçılıq fəaliyyəti ilə məşğul olmaq üçün hasarlaması, kənd sakinlərinin əraziyə buraxılmasının qadağan edilməsi və ərazidən pis qoxunun gəlməsinin yerli sakinlərin ciddi narazılığına səbəb olmasına dair KİV-də yayılmış videoreportaj və digər materialları baş prokuror nəzarətə götürməklə fakt üzrə araşdırmanın aparılması Cinayət təqibindən kənar icraatlar idarəsinə tapşırılıb.

Aparılmış araşdırmalarla, “Az Fish”nin balıqçılıq fəaliyyəti ilə məşğul olmaq üçün lisenziyası olmadan Xaçmaz rayonu, Sərəkli kəndi ərazisində icarə müqaviləsində nəzərdə tutulduğundan dəfələrlə artıq torpaq sahəsini qanunla müəyyən edilmiş mülkiyyət, istifadə və ya icarə hüququ olmadan özbaşına zəbt edərək hasarlamasına, bununla da cəmiyyətin vəzifəli şəxslərinin xidməti vəzifələrinin icrası ilə əlaqədar qanunsuz üstünlük əldə etmək məqsədilə qulluq səlahiyyətlərindən qulluq mənafeyinə qəsdən zidd olaraq istifadə etməklə dövlətin və cəmiyyətin qanunla qorunan mənafelərinə mühüm zərər vurmasına əsaslı şübhələr müəyyən edilib.

Yoxlama zamanı toplanmış materiallarda torpaq üzərində mülkiyyət, istifadə və ya icarə hüququnu pozma və vəzifə səlahiyyətlərindən sui-istifadə ilə bağlı cinayətlərin əlamətləri müəyyən olunduğundan, fakta görə “Az Fish”nin vəzifəli şəxsləri barədə Cinayət Məcəlləsinin 188.1 (torpaq üzərində mülkiyyət, istifadə və ya icarə hüququnu pozma) və 308.1-ci (vəzifə səlahiyyətlərindən sui-istifadə) maddələri ilə cinayəti işi başlanaraq, istintaqın aparılması Baş Prokurorluğunun İstintaq idarəsinə həvalə edilib.

İstintaqın gedişatı barədə ictimaiyyətin məlumatlandırıması təmin ediləcək.