"Bir sual, bir cavab" - Həkimə getmək üçün icazə alıb gəzməyə gedənlərə hansı cəza verilir?

Lent.az-ın “Bir sual, bir cavab” rubrikasının bugünə olan mövzusu müvafiq kodla SMS icazə alan şəxsin ondan təyinatı üzrə istifadə etməməsi ilə bağlıdır.

SMS-lə icazənin tətbiq olunduğu dövrdə ən çox yol verilən nöqsanlardan biri alınan icazədən təyinatı üzrə istifadə edilməməsidir. Bəziləri üçün evdən çıxmağa icazə sənədi rolu oynayan bu SMS-lər əksər hallarda onların öz maraqlarını gerçəkləşdirməyə vasitəçi olur. Məsələn, bundan əvvəlki SMS-lə icazənin tətbiq edildiyi dövrdə onlarla insan 3 kodu üzrə, yəni, qohumlarının dəfinində iştirak etmək bəhanəsilə evdən çıxaraq, öz istəklərini həyata keçirməyə çalışıblar.

“Müvafiq kodla SMS icazə alıb ondan təyinatı üzrə istifadə etməyənlərə hansısa cəza nəzərdə tutulurmu?” sualına hüquqşünas Şamil Paşayev aydınlıq gətirib. Onun sözlərinə görə, həmin şəxslərin sözügedən məsələdə fəaliyyətini sübuta yetirmək mümkün olmadığı üçün onlar məsuliyyətə cəlb edilmir:

“Bildiyiniz kimi, karantin qaydalarına riayət etməyənlər İnzibati Xətalar Məcəlləsinin 211-ci maddəsinə əsasən, müvafiq qaydada cərimələnirlər. SMS vasitəsilə göndərilən 1, yaxud 2 kodundan təyinatı üzrə istifadə etməyənlər məsuliyyətə cəlb oluna bilər. Ancaq məsələ burasındadır ki, onu sübut etmək kifayət qədər çətindir. Ona görə də hüquq-mühafizə orqanları həmin şəxsləri cərimələmək və məsuliyyətə cəlb etməyə təşəbbüs göstərmirlər. Yəni, cərimələrin tətbiq edilməsi də, həm sosial ədaləti bərpa etmək, həm də insanları inzibati xəta törətməkdən çəkindirmək məqsədi daşıyır. Bu kimlərinsə şəxsi istəyi deyil. Ümumiyyətlə, cərimələmək, cəzalandırmaq cəmiyyətin qanunlara hörmət ruhunda yaşaması üçün əsas mübarizə vasitəsi deyil, sadəcə yardımçı rola malikdir. İnsanların qanuna, hüquqa hörmətlə yaşamasını təmin etmək üçün sosial-iqtisadi, siyasi və ideoloji, maarifləndirici tədbirlərə xüsusi yer verilməlidir. Bunlar nəticə verməkdikdə, son tədbir kimi cəzalandırma tətbiq edilməlidir. Cəzalar eyni zamanda, sosial ədaləti bərpa etməni özündə əks etdirməlidir.

Həm özümüzü qorumaq, həm də digərlərinin haqqına girməmək üçün Operativ Qərargahın tələblərinə riayət etməliyik”.