Azərbaycanda adam oğurlayan idmançılara 40 il CƏZA

Bakıda adam oğurluğunda təqsirləndirilən dəstənin cinayət işi üzrə məhkəmə istintaqı başa çatıb.

Lent.az-ın APA-ya istinadla xəbərinə görə, bu gün Bakı Ağır Cinayətlər Məhkəməsində keçirilən prosesdə hökm oxunub.

Hökmə əsasən təqsirləndirilən şəxslər - Elçin Quliyev 11 il, Vasif Allahverdiyev 10 il, Niyaməddin Kazımlı, Şaiq Hüseynov və Fəqan Eminoğlu 8 il 6 ay azadlıqdan məhrum edilib.

Cinayət işi üzrə təqsirləndirilən Fərəh Rəsulovaya isə sınaq müddəti seçilməklə şərti cəza verilib.

Adam oğurluğunda sifarişçi olan Aygün Abbasovaya isə 5 il həbs cəzası təyin edilib. A. Abbasova cəzasını övladının 14 yaşı tamam olandan sonra çəkməyə başlayacaq.

Qeyd edək ki, təqsirləndirilən şəxslər Dövlət Təhlükəsizliyi Xidməti (DTX) tərəfindən keçirilən əməliyyatla saxlanılıblar. Dəstə üzvləri arasında idmançılar, dünya və Avropa çempionları var.

Məlumata görə, Xətai rayon sakini Hüseyn Əsgərovun Aygün Abbasovaya 25 min manat borclu olub. Borcunu qaytara bilmədiyi üçün Aygün Abbasovanın sifarişi ilə kafelərin birinə dəvət edilib.

Əvvəllər məhkum olunan Vasif Allahverdiyev, Sumqayıt şəhər sakinləri – əvvəllər məhkum olunan Şaiq Hüseynov və Fəqan Eminoğlu tərəfindən məcburi qaydada, iradəsindən kənar avtomobilə əyləşdirilərək Aygün Abbasovanın Pirşağı qəsəbəsində yerləşən bağ evinə aparılıb. Onlar həmin ünvana daha sonra gələn Bakı şəhər sakini, əvvəllər məhkum olunan Niyaməddin Kazımlının iştirakı ilə Hüseyn Əsgərova müxtəlif dərəcəli bədən xəsarəti yetirərək 25 min manatın əvəzinə 30 min manat ödəməsini bildirərək işgəncə veriblər. Alınan pulun müqabilində Aygün Abbasova həmin şəxslərə 10 min manat verəcəyini vəd edib.

Keçirilən kompleks əməliyyat-axtarış tədbirləri nəticəsində Şaiq Hüseynov, Fəqan Eminoğlu, Vasif Allahverdiyev, Aygün Abbasova və Niyaməddin Kazımlı müəyyən olunaraq saxlanılıb, zərərçəkən Hüseyn Əsgərov girov saxlandığı yerdən sağ-salamat azad olunub.

Təqsirləndirilən şəxslərə qarşı Cinayət Məcəlləsinin 144.2.3-cü (bir qrup şəxs, qabaqcadan əlbir olan bir qrup şəxs və ya mütəşəkkil dəstə və ya cinayətkar birlik (cinayətkar təşkilat) tərəfindən adam oğurluğu törətmək), 144.2.4-cü (zərərçəkmiş şəxsin həyatı və ya sağlamlığı üçün təhlükəli olan zor tətbiq etməklə adam oğurluğu törətmək) və 144.2.6-cı (tamah məqsədi ilə və ya sifarişlə adam oğurluğu törətmək) maddələri ilə ittiham elan edilib.

Onu da qeyd edək ki, Fərəh Rəsulova universal döyüş üzrə dünya və Avropa çempionudur. İş üzrə zərərçəkmiş kimi tanınan şəxs Hüseyn Əsgərov da idmançı olub. Niyaməddin Kazımlı peşəkar idmançıdır. O, klassik güləş üzrə dəfələrlə Azərbaycan çempionatının və beynəlxalq yarışların mükafatçısıdır.