Avtomobil YANDI, sürücü özünü dərəyə ATDI - AZƏRBAYCANDA - YENİLƏNİB

Ağsu dolaylarında avtomobilin yol kənnarına aşması ilə bağlı Fövqəladə Hallar Nazirlyi məlumat yayıb.

Nazirlikdən Lent.az-a verilən məlumata görə, Ağsu rayonunda (Bakı-Şamaxı-Yevlax magistral avtomobil yolunun 156-cı kilometrliyi) "Mercedes" markalı minik avtomobili yol kənarına aşıb.

Nəticədə avtomobilin yanar hissələri yanıb. Yaxınlıqdakı ağaclar yanğından mühafizə olunub. Yanğın yanğından mühafizə bölmələri tərəfindən söndürülüb.

***

21:29

Ağsu aşırımında yanğınla nəticələnən yol-nəqliyyat hadisəsi baş verib.

Lent.az APA-ya istinadən xəbər verir ki, Bakı-Şamaxı-Yevlax avtomobil yolunun Ağsu dolaylarından keçən hissəsində hərəkətdə olan “Mercedes” markalı minik avtomobili bu gün axşam saatlarında idarəetmənin itməsi nəticəsində yoldan çıxaraq dərəyə aşıb.

Ağaca çırpılan avtomobil zərbənin təsiri nəticəsində yaranan qısa qapanma zamanı yanmağa başlayıb.

Sürücü avtomobilin yoldan çıxdığı an özünü aşağı atıb, yüngül xəsarət alıb.

Hadisə yerinə Ağsu rayon təcili və təxirəsalınmaz tibbi yardım stansiyasının əməkdaşları və Ağsu Dövlət Yanğından Mühafizə Hissəsinin avtomobilləri və canlı qüvvəsi cəlb olunub.

Avtomobil tamamilə yanaraq yararsız hala düşüb.

Yanğınsöndürənlər alovu tam söndürüb və meşə zolağına keçməsinin qarşısını alıb.

Faktla bağlı Baş Dövlət Yol Polisi İdarəsinin istintaq və təhqiqat şöbəsi tərəfindən araşdırma aparılır.