Sərt karantin zamanı bu cinayət olmadı

Məlum olduğu kimi, ötən həftəsonu Bakı, Gəncə, Sumqayıt, Lənkəran şəhərləri və Abşeron rayonunda sərtləşdirilmiş karantin rejimi tətbiq olundu. Buna əsasən, insanların mayın ortalarına qədər SMS-lə icazə alıb evdən çıxmaq icazəsi də ləğv olunub. Bir sözlə, vətəndaşların sərt karantin günlərində evlərini tərk etmələri, ictimai iaşə obyektlərinin fəaliyyəti isə qadağan edilib.

Tətbiq olunan rejimə nəzarət etmək üçün isə polis əməkdaşları və Daxili Qoşunların hərbçiləri tərəfindən nəinki mərkəzi yerlərdə və yollarda, hətta yaşayış yerlərində də nəzarət tədbirləri aparılır. Bəs görək, həftəsonu tətbiq olunan mövcud rejimli günlərdə evlərdən oğurluq hadisəsi olubmu?

Lent.az Daxili İşlər Nazirliyinin kriminal statistikasına əsasən, xəbər verir ki, sərt karantin günlərində nəinki fəaliyyətin qadağan edildiyi böyük şəhərlərdə, hətta digər rayonlarda da evlərdən oğurluq hadisəsi olmayıb. Bundan əvvəlki ardıcıl həftəsonlarında 1, mayın 14-15-də isə 2 oğurluq hadisəsi qeydə alınıb.