Narkotik satanlar saxlanıldılar

Hacıqabul rayon Polis Şöbəsinin keçirdiyi əməliyyat-axtarış tədbirləri nəticəsində narkotik vasitələrin satışı ilə məşğul olan şəxslər saxlanılıblar.

APA-nın Mil-Muğan bürosunun məlumatına görə, üzərində narkotik vasitə saxlaması ehtimalının olması ilə əlaqədar rayon sakini, 32 yaşlı Cəfərov İbrahim Xəqani oğlu saxlanılaraq Polis Şöbəsinə aparılıb. Üzərinə baxış keçirilən zaman ondan satış üçün nəzərdə tutulan narkotik vasitələr olan qurudulmuş marixuana və heroin aşkar edilərək götürülüb.

Keçirilən əməliyyatın davamı olaraq adıçəkilən şəxsə narkotik vasitə olan qurudulmuş marixuananı 45 manata satan Sabirabad rayonu, Yaxa Dəllək kənd sakini, əvvəllər məhkum olunmuş, 54 yaşlı Əsədov Əyyub Əfrasiyab oğlu saxlanılıb. Sonuncunun üzərinə baxış keçirilən zaman ondan müxtəlif çəki və bükümlərdə satış üçün nəzərdə tutulan narkotik vasitə olan qurudulmuş marixuana aşkar edilərək götürülüb.