Bakıda arvadını öldürmək istəyən kişiyə...

İyunun 4-də saat 21 radələrində paytaxtın Sabunçu qəsəbə sakini, 30 yaşlı Günel Babayevaya çoxsaylı bıçaq xəsarətləri yetirilməsi barədə daxil olmuş məlumat əsasında prokurorluq və polis əməkdaşları dərhal hadisə yerinə baxış keçirib.

Sabunçu rayon Prokurorluğundan Lent.az-a daxil olan məlumata görə, G.Babayevanın hadisə yerində olan şəxslərin köməkliyi ilə vaxtında xəstəxanaya yerləşdirilməsi nəticəsində həyatını xilas etmək mümkün olub.

Aparılmış araşdırmalarla zərərçəkənin əri, 34 yaşlı Ramiq Dadaşovun yaşadıqları evdə aralarında qısqanclıq zəminində yaranmış münaqişə zamanı onu qəsdən öldürməyə cəhd etməsinə əsaslı şübhələr müəyyən edilib.

Faktla bağlı Sabunçu rayon prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanıb.

İş üzrə müvafiq ekspertizalar təyin olunmuş, şahidlər dindirilmiş və digər zəruri prosessual hərəkətlər yerinə yetirilib.

R.Dadaşov könüllü gələrək cinayətin aləti olan bıçağı istintaqa təqdim edib.

R.Dadaşov şübhəli şəxs qismində tutulmuş, müdafiəçinin iştirakı ilə dindirilərkən törətdiyi əməli etiraf edib.

Hazırda iş üzrə zəruri istintaq-əməliyyat tədbirləri davam etdirilir.