15 koronavirus xəstəsi saxlanıldı, cinayət işi açıldı

Koronavirus xəstələri ictimai yerlərdə müəyyən olunaraq saxlanılıblar.

Daxili İşlər Nazirliyindən Lent.az-a verilən məlumata görə, aprelin 5-də polis əməkdaşları respublika ərazisində 15 nəfər aktiv koronavirus xəstəsi ictimai yerlərdə aşkar edərək saxlayıblar.

Ev şəraitində müalicə təyin edilməsinə baxmayaraq, yaşayış yerini tərk edən İmişli rayon sakini E.Vəliyev, Şabran rayon sakini R.Ağamirzəyev və Bərdə rayon sakini Ə.Məmmədova barəsində Cinayət Məcəlləsinin 139-1.1 (epidemiya əleyhinə və karantin rejimlərinin pozulması) maddəsi ilə cinayət işi başlanılıb. Digər vətəndaş barəsində araşdırmalar davam etdirilir.

Polis əməkdaşları onlarla izahedici söhbətlər aparıb, tibbi prosedurları gözləməklə yaşadıqları evə qaytarıb, bu barədə müvafiq səhiyyə qurumları məlumatlandırılıb.

Nazirlik bir daha vətəndaşları xüsusi karantin rejiminin tələblərinə ciddi əməl etməyə çağırıb.