Suraxanıda yol qəzaları: 1 ölü, 9 yaralı

Suraxanı rayon Polis Şöbəsindən Lent.az-a verilən məlumata görə, baş vermiş qəzalar nəticəsində 1 nəfər ölüb, 9 şəxs isə yaralanıb.

Məlumata görə, ilk hadisə saat 20 radələrində Aeroport şossesində qeydə alınıb. 90 BV 070 nömrə nişanlı “Mercedes” və 10 OH 977 nömrəli “VAZ 2107” toqquşub. Nəticədə həmin avtomobillərdə olan 6 nəfər - Əmirəhmədov Eyvaz Şahəmbər oğlu (1973), Süleymanov Tahir Səlimxan oğlu (1985), Məmmədov Samir İbrahim oğlu (1984) və bir ailənin üzvləri olan Mehdiyev Ənvər Cəlil oğlu (1986), Mehdiyeva Tamella Sərvan qızı (1958), Mehdiyeva Təranə Səmraz qızı (1991) müxtəlif bədən xəsarətləri alıblar.

Saat 20:25-də isə Hövsan-Zığ yolunda 90 KK 439 nömrə nişanlı “Mercedes” aşıb. Nəticədə avtomobilin sürücüsü 1961-ci il təvəllüdlü Abbaszadə Yunis Əli oğlu və sərnişinləri bacısı 42 yaşlı Rəna və qardaşı 39 yaşlı Emil ağır bədən xəsarətləri alıblar.

Suraxanıda baş vermiş digər hadisə isə ölümlə nəticələnib. Yeni Günəşli D yaşayış massivi ərazisində 141 saylı xətt üzrə hərəkət edən H 019 957 nömrəli marşrut avtobusu yolu keçmək istəyən kişini vurub. Nəticədə piyada – 1953-cü il təvəllüdlü Nuriyev Paşa İsa oğlu aldığı xəsarətlərdən ölüb.

Nizam RZA