Siyəzəndə polis qardaşlar qəzaya uğradı: 2 ölü, 2 yaralı

Bu gün saat 02:00 radələrində Siyəzən rayonunda iki nəfərin ölümü ilə nəticələnən yol qəzası baş verib.

Baş Dövlət yol Polisi İdarəsindən Lent.az-a verilən məlumata görə, Bakı-Quba yolunda, Siyəzən rayonunun Zarat kəndi ərazisində 90 EE 102 nömrə nişanlı, “Mercedes” markalı avtomobil yolun kənarındakı maneəyə çırpılıb. Nəticədə Siyəzən Rayon Polis Şöbəsinin polisi əməliyyat müvəkkili, 36 yaşlı Xəyyam Məmmədov və onun həyat yoldaşı hadisə yerində ölüblər.

X.Məmmədovun qardaşı, Xaçmaz Polis Şöbəsinin şəxsi heyət üzrə rəis müavini Tanrıverdi Məmmədov və onun həyat yoldaşı Vəfa Məmmədova isə yaralı vəziyyətdə xəstəxanaya yerləşdiriliblər.

Qeyd edək ki, qəzaya uğramış avtomobil Xaçmaz Polis Şöbəsinin şəxsi heyət üzrə rəis müavini Tanrıverdi Məmmədova məxsusdur.

Faktla bağlı araşdırma aparılır.

Nizam Rza