Elçin Behbudovun təşkilatının təsisçilərindən biri tutulub

Pərviz Dəyistani və Dövlət Torpaq və Xəritəçəkmə Komitəsinin əməkdaşı saxta sənəd hazırlayıb satmaq təqsirləndirilir

DİN Baş Mütəşəkkil Cinayətkarlıqla Mübarizə İdarəsi əməkdaşlarının keçirdikləri əməliyyat tədbirləri nəticəsində Bakı şəhər sakinləri - Azərbaycan respublikası Dövlət Torpaq və Xəritəçəkmə Komitəsinin Bakı Kartoqrafiya Fabrikinin redaktoru İrina Konovalova və "İşgəncələrə Qarşı Komitə" qeyri-hökumət təşkilatının həmtəsisçisi Pərviz Dəyistani saxta şəxsiyyət vəsiqəsi hazırlayıb satarkən tutulublar.

Lent.az-ın Daxili İşlər Nazirliyinin saytına istinadən məlumatına görə, İ.Konovalovanın evinə baxış zamanı saxta sənədlərin hazırlanması üçün nəzərdə tutulmuş blank, arayış, hüquq verən sənəd nümunələri, müxtəlif möhürləri özündə əks etdirən disket, kompüter və skayner aşkarlanaraq götürülüb.
Faktla əlaqədar BMCMİ-nin İstintaq şöbəsində cinayət işi başlanıb, istintaq aparılır.