Bakıdan Tümenə narkotik daşıyan azərbaycanlı məhkəmə qarşısında

Rusiyanın Tümen Vilayət Prokurorluğu qanunsuz narkotik vasitə dövriyyəsində ittiham etdiyi Azərbaycan əsilli 48 yaşlı Sahib Həsənov və 26 yaşlı German Şmuxinanın işini məhkəməyə göndərib.

Lent.az-ın “proctmo.ru” saytına istinadən verdiyi məlumata görə, Rusiya vətəndaşı olan və Tümendə yaşayan Sahib Həsənov Azərbaycandakı narkotacirlərlə əlaqə qurub və 2009-cu ilin oktyabrında Bakıdan Tümenə satmaq məqsədi ilə böyük həcmdə həşiş aparıb.

O, həşişi çantasında qurudulmuş meyvələrin altında gizlədib. 2009-cu il oktyabrın 23-də axşam Sahib Həsənov narkotik vasitəni Rusiyaya keçirib. Həşişi satmaq üçün bu işə tanışı German Şmuxinanı cəlb edib. 2010-cu ilin iyulunda onlar birlikdə həşişi satıblar. 2010-cu ilin avqustunda onların davranışları Rusiya hüquq-mühafizə orqanlarının diqqətini cəlb edib. Xüsusi əməliyyat zamanı onların üzərində 50 qram həşiş və 100 qram marixuana aşkarlanıb. Araşdırma zamanı iyul ayında onların böyük həcmdə həşişi satdıqları üzə çıxıb. Prokurorluq Sahib Həsənovun 15 il azadlıqdan məhrum edilməsini istəyir.