Bakıda dəhşətli qətliam: 4 ölü, 1 yaralı - TƏFƏRRÜAT

Yanvarın 11-nə keçən gecə Bakıda dəhşətli qətl hadisəsi baş verib. Nizami rayon Polis İdarəsindən Lent.az-a verilən məlumata görə, paytaxtın Nizami rayon sakini Mehrəliyev Rövşən Qəribxan oğlu arvadı, anasını və 2 uşağını çoxsaylı bıçaq zərbələri ilə öldürüb. Digər uşaq isə qaçaraq qonşuya gedib və hadisə barədə polisə məlumat verilib.

R.Mehrəliyev daha sonra özünü də öldürmək istəyib. Lakin özünə bıçaqla ağır xəsarət yetirsə də, ölməyib. O, hazırda 3 saylı şəhər xəstəxanasındadır.

Faktla bağlı cinayət işi başlanılıb.

Lent.az-a verilən digər məlumata görə, R.Mehrəliyev Nizami rayon Şirin Mirzəyev küçəsi 72-ci bina ev 34-də anası 1950-ci il təvəllüdlü Mehrəliyeva Elmira Şərifəddin qızı, arvadı 1978-ci il təvəllüdlü Mehrəliyeva Lalə Qədim qızını, qızı 2004-cü il təvəllüdlü Səidəni və 4 yaşlı oğlu İlhamı çoxsaylı bıçaq zərbələri ilə qətlə yetirib.

Atasının törətdiyi hadisələri görən R.Mehrəliyevin qızı, 8 yaşlı Nuranə qaçaraq qonşuya xəbər verib və dərhal evə polislər gəlib. Polislərin gəldiyini görən R.Mehrəliyev özünə bıçaqla bir neçə zərbə vurub. Hüquq-mühafizə orqanlarının nümayəndələri dərhal onu 3 saylı şəhər xəstəxanasına aparıblar. Yaralının vəziyyətinin ağır olduğu bildirilir.

Nizam Rza