Bakıda 3 avtomobil toqquşdu: 1 ölü

Lent.az-ın hadisə yerində olan əməkdaşının verdiyi məlumata görə, Nizami rayon Babək prospektində 3 avtomobil toqquşub.

Şəhərin mərkəzi istiqamətində yüksək sürətlə hərəkət edən 90 HN 090 dövlət nömrə nişanlı “VAZ 2107” qəfil yoldan çıxıb. Avtomobil yolun ortasındakı maneəni də aşaraq əks istiqamətə keçib və “Xalqlar Dostluğu” dairəsinə doğru hərəkət edən 90 CJ 933 dövlət nömrə nişanlı “Meredes” və 90 HN 838 nömrə nişanlı digər “Mercedes”lə toqquşub.

Qəza nəticəsində “VAZ 2107”-nin sürücüsü 1984-cü il təvəllüdlü Ağayev Rauf Eldar oğlu hadisə yerindəcə ölüb. “Mercedes”lərdəki şəxslər isə ciddi xəsarət almayıb.

Qeyd edək ki, qəzadan dərhal sonra yanğın hadisəsi baş verib. Hadisə yerinə gəlmiş yanğınsöndürənlər yanğının qarşısını alıb.

Faktla bağlı Nizami rayon Polis İdarəsində araşdırma aparılır.

Nizam Rza