Şahdağ Milli Parkının 10 hektar meşə sahəsi yanıb

Rayon Dövlət Yanğından Mühafizə Hissəsindən APA-nın yerli bürosuna verilən məlumata görə, Qəbələnin Tikanlı və Solqıca kəndləri arasındakı meşədə baş verən yanğın 8 gündür davam edir. Dəniz səviyyəsindən 1500 metr yüksəklikdəki dağlıq ərazidə qeydə alınan yanğının söndürülməsi üçün texnikanın köməyindən istifadə etmək mümkün olmayıb. Ərazidə yalnız əl əməyindən istifadə edilib. Yanğının qarşısının alınması üçün əraziyə bir helikopter də cəlb olunub. Alovun qarşısı alınıb və yanğın dünən axşam saatlarında məhdudlaşdırılıb, hazırda yanğın ocaqlarının tam söndürülməsi istiqamətində iş aparılır.

Hadisə yerində Fövqəladə Hallar Nazirliyinin Şimal-Qərb Regional Mərkəzinin, rayon Yanğından Mühafizə Hissəsinin, Meşə Mühafizəsi və Bərpası Müəssisəsinin 80-ə yaxın əməkdaşı çalışır. Təxminən 10 hektar ərazidə ağac, xəzəl və kol-kos yanıb.