Xaçmazda 4 maşın toqquşdu: 1 ölü, 5 yaralı

Dekabrın 27-də saat 18 radələrində Xaçmaz-Quba yolunun Yergüc kəndi ərazisində ağır yol-nəqliyyat hadisəsi baş verib.

“Ford” markalı 90 AU 760 dövlət nömrə nişanlı avtomaşın 10 LF 743 dövlət nömrə nişanlı maşınla toqquşub. Bundan sonra 10 XJ 773 dövlət nömrə nişanlı “VAZ 2107” markalı avtomaşınla “Vaz 21-099” markalı avtomaşında qəza törədib. Lent.az-ın bölgə müxbirinin verdiyi məlumata görə, qəza nəticəsində bir nəfər 2010-cu ildə anadan olan Yergüc kənd sakini İsa Zəkiyev dünyasını dəyişib. Daha 5 nəfər müxtəlif bədən xəsarətləri ilə xəstəxanaya yerləşdirilib.

Xaçmaz rayon Mərkəzi Xəstəxanasından Lent.az-a verilən məlumata görə, xəsarət alanlar 25 yaşlı Nigar Zəkiyeva, 8 yaşlı Nicat Zəkiyev, 10 yaşlı Aydan Zəkiyev və “VAZ 2107”-nin sürücüsü 72 yaşlı Orucəli Orucovdur. Orucəli Orucov və Nigar Zəkiyevanın vəziyyətinin ağır olduğu bildirilir.

“VAZ-21099” markalı maşının sürücüsü, 41 yaşlı Sahib Pirməmmədov da müxtəlif bədən xəsarətləri ilə xəstəxanaya yerləşdirilib.

İlkin tibbi müayinədən sonra Nicat Zəkiyev və Sahib Pirməmmədov evə buraxılıb.

Faktla bağlı Xaçmaz rayon Polis Şöbəsində Cinayət Məcəlləsinin müvafiq maddəsi ilə cinayət işi açılıb, araşdırmalar davam etdirilir.

Vəli Turan