Deputatın öldürülməsinə fətva verən nardaranlıya yenidən iş verildi

Bu barədə APA-ya Nardaran kənd Ağsaqqallar Şurasının üzvü Məşədi Natiq Kərimov məlumat verib.

Onun sözlərinə görə, dekabrın 23-də Sabunçu Rayon Məhkəməsində hakim Tahir Qubadov sədrliyi ilə keçirilən prosesdə Ə. Hüseynov 2 il 6 ay müddətinə azadlıqdan məhrum edilib.

Qeyd edək ki, təqsirləndirilən Hacı Əli Hüseynov sentyabrın 22-də saat 18.00 radələrində kənd ərazisində Nardaran Pirinə gedən küçədə abadlıq işləri apararkən polis tərəfindən saxlanıb. Onun üzərindən narkotik tapılıb. Ə. Hüseynova qarşı Azərbaycan Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) ittiham elan edilib.

Xatırladaq ki, Hacı Əli Hüseynov 2009-cu il yanvarın 9-da Nardaran qəsəbəsində keçirilən mitinq zamanı Vətəndaş Həmrəyliyi Partiyasının sədri, Milli Məclisin deputatı Sabir Rüstəmxanlının öldürülməsi ilə bağlı fətva verdiyinə görə, 1 il müddətinə azadlıqdan məhrum edilmişdi.